وفاقی وزیر تجارت جام کمال خان نے پاکستان ڈجیٹل اتھارٹی (PDA) اور اسکائی 47 (Sky47) کے نمائندوں سے الگ الگ ملاقاتیں کی ہیں تاکہ وزارت تجارت اور اس سے منسلک اداروں کے لیے ایک محفوظ اور مصنوعی ذہانت (AI) سے آراستہ ڈجیٹل ایکو سسٹم قائم کیا جا سکے۔
ملاقاتوں میں تجارتی ڈیٹا کو قومی اثاثہ قرار دیتے ہوئے پاکستان کے خودمختار کلاؤڈ اور ڈیٹا سینٹر انفراسٹرکچر کو مضبوط بنانے اور برآمدی پالیسی سازی کے لیے AI کے استعمال پر زور دیا گیا۔ وزیر تجارت کے مطابق پاکستان کے پاس ہزاروں ٹیرف اور پروڈکٹ لائنز، برآمد کنندگان اور بین الاقوامی منڈیوں کا ڈیٹا موجود ہے، جسے محفوظ اور یکجا فارمیٹ میں تبدیل کرنا ضروری ہے۔
پاکستان ڈجیٹل اتھارٹی نے وزیر تجارت کو ڈیٹا گورننس، انٹرپرائز آرکیٹیکچر اور کلاؤڈ ایڈاپشن کے قومی فریم ورک پر بریفنگ دی۔ اسکائی 47 کی انتظامیہ کے ساتھ ڈیٹا سینٹر کی صلاحیت، سائبر سیکیورٹی اور ڈیزاسٹر ریکوری پر گفتگو کی گئی۔ اس کے علاوہ سرکاری ڈجیٹل خریداری کے عمل کو تیز بنانے اور چھوٹے و درمیانے درجے کے کاروباری اداروں (SMEs) کے لیے ایک اوپن نیٹ ورک فار ڈجیٹل کامرس قائم کرنے پر بھی غور کیا گیا۔
Read the full story on the original publisher’s website.
Open original article